Le chant des Wallons

Nos-èstans fiérs di nosse pitite patrîye
Va laudje èt lon, on cause di sès-èfants.
Au prumî rang on l' boute po l' industrîye,
Èt dins les ârts èle riglatit ostant.
Nosse tère èst p'tite mins nos-avans l' ritchèsse
Dès-omes savants qui faîyenut valu s' nom.
Èt l' libèrté por nos passe divant l' rèsse,
Vola poqwè qu'on-z-èst fiérs d'yèsse Walons.
Èt l' libèrté por nos passe divant l' rèsse,
Vola poqwè, vola poqwè, qu'on-z-èst fiérs d'yèsse Walons


On s' vwèt voltî inte fréres dè l' Walonîye,
On z-èst tot prèt' onk-l'ôte è s' doner l' mwin.
On s' faît plaîji, bin sovint, sins qu'on l' dîye,
Nuk ni s' mostère quand c'èst qu'i vout fé l' bin.
Li charité qui mousse è l' maujonète,
N'î va qu'à l' nêt, avou mile précaucions.
Li pau qu'on done, on nè d' done qu'à catchète,
Vola poqwè qu'on-z-èst fiérs d'yèsse Walons.
Li pau qu'on done, on nè d' done qu'à catchète,
Vola poqwè, vola poqwè, qu'on-z-èst fiérs d'yèsse Walons
Pitit payis, vos qu'a tant d' grandeû d'âme,
Nos v' s-in.mans bin sins qu' nos l' criyanche tot wôt.
Quand on v' discause, aus-ouy montenut nos lâmes
Èt nos sintans nosse coeûr bate à gros côps.
N'eûchîz nin peû, fuchîz tofêr à l' fièsse,
Di vos-èfants lès brès èt l' coeûr sont bons.
Èt nos-avans lès tch'fias fwârt près dè l' tièsse,
Vola poqwè qu'on-z-èst fiérs d'yèsse Walons.
Èt nos-avans lès tch'fias fwârt près dè l' tièsse,
Vola poqwè, vola poqwè, qu'on-z-èst fiérs d'yèsse Walons
Choûter l' musique
Distchinde li fichier midi
Retour