On maleûr à l'cinse

Ci matin-là, quand Gustave a moussî è stauve po mode lès vatches, il a sintu s' coeûr si sèrer: li Blanchète, li pus bèle di sès bièsses, èsteûve stindûwe dins li strin come po moru.
À dadaye, il a voré dins l' maujone èt criyî après s' feume:
- Zîréye, où èstoz?
Pont d' rèsponse.
- ZÎRÉYE, dj'a dandjî d' vos !
Il ètind one pitite vwès, qui vint d'à l' copète:
- Dji so coûtchîye, Tave, dji so malade !
I faleûve co bin ça. Li Tave prind l' tèlèfone et uker l' médecin, pwis l' vétèrinaîre.

One eûre après, li docteûr èsteûve là. Quand il a ieû tot faît, il a faît one ôrdonance.
- Aloz cwê ça audjoûrdu, ça l' va r'taper. Èt por mi, ça sèrè noûf cints francs, s' i vos plaît bin.
One miète pus taurd, li vétèrinaîre a arivé èt ça a stî l' minme afaire: one ôrdonance, èt iût cints francs ç'côp-ci.
Gustave a d'né lès caurs èt pinser:
- Dj'a co dè l' chance qu'on n' paye nin au pwèds !
Il a mètu s' calote èt èvôye po l' fârmacerîye.

- Bondjoû mossieû Pestiaux, dj'a deûs malades à l'cinse.
Èt raconter tos sès maleûrs.
- Achîtoz-vos, Gustave, dji m' vos va apruster ça tot d' chûte.
Dîs munutes pus taurd, lès drogues èstin.n' prètes.
- Vo-lès-là, Gustave. Lès rodjes po vosse feume, lès djanes po vosse vatche. Ni v'-z-aloz nin brouyî don !
- Dji n' pou mau, mossieû Pestiaux. One bièsse qu'a ieû deûs mèdayes d'ôr...
Il èva.

Trwès djoûs pus taurd, li fârmaçyin a one doutance. I tèlèfone à l' cinse:
- Qué novèles Gustave, èt vosse vatche ?
- Â mossieû Pestiaux, èlle èst crèvéye.
- Mâria Dèyi ! Èt... èt vosse feume ?
- Ô lèye, èle va bin: èle done dîs lites !