I gn-a r'méde à tot

Li tèlèfone sone dins l' fârmacerîye.
- Pharmacie Pestiaux, j'écoute.
- Bondjoû mi p'tit poyon. Dj'a fini mes comissions, mins dj'ènn'a plin lès brès. Fioz m' plaîji, vinoz mi r'cwê à Nameur.
- Vos savoz bin qu' nos n' sèrans l' fârmaceryîe qu'à chîj eûres.
- I n' vos faurèt wêre di pus qu'one diméye eûre. Vos n'avoz qu'à d'mander à Albèrte di sièrvu l' pratique.
- Faurèt bin d'abôrd.

Il uke li mèskène, one vayante bauchèle do viladje.
- Albèrte, vinoz one miète véci
- Dj'arive, mossieû Pestiaux.
- Albèrte, dji deu aler r'cwê m' feume à Nameur. Vos-aloz t'nu l'botique su ç' timps-là.
- Ô mins dji n' coneu rin dins tot ça, savoz mi.
- Ni v'-z-è fioz nin, tot èst s'crît d'ssus lès bwèsses. Èt si c'èst trop malaujîy, vos n'auroz qu'à fé ratinde li djin.
Il èva.

One eûre pus taurd, i rarive.
- Qué novèles Albèrte ? Comint èst-ce qui ça a stî ?
- Dja ieû quate pratiques, mossieû Pestiaux
- Racontoz m' tot ça, m' fèye.
- Li prumî, c'èsteûve on-ome qu'aveûve mau s' tièsse.
- Èt qu'avoz faît ?
- Djè lî a d'né d' l'aspirine.
- Vos-avoz bin faît.
- Adon dj'a ieû one feume avou si p'tit gamin qu'èsteûve tot flauw.
- Èt qu'avoz faît ?
- Djè lî a d'né do colifon
- Boune idéye.
- Adon one feume qu'aveûve mau s' vinte
- Èt qu'avoz faît ?
- Djè lî a d'né do bicarbonâte
- Ca n' lî f'rè todi pont d' mau...
- Ét l' quatyinme, c'èsteûve on-ome avou on-impèrmèyâbe. I l'a douviè èt i n'aveûve rin pa-d'zos. Èt m' dîre:
- Dji n'a pus vèyu one feume dispus trwès mwès !
- Mâria Dèyi ! Èt qu'avoz faît ?
- Djè lî a d'né dès gotes po sès-ouys.